Масъулони сохтмони нерӯгоҳи барқи обии Роғун мегӯянд, дар ворид намудани мошинолот ва таҷҳизоти лозим барои идомаи сохтмони Роғун аз тариқи Узбакистон ба мушкил мувоҷеҳ шудаанд ва қасд доранд, тавассути роҳҳои алтернативӣ таҷҳизоти зарурӣ барои идомаи сохтмонро ворид кунанд. Нурулло Шулашов, раиси сохтмони Роғун дар сӯҳбате бо Озодӣ гуфт, ки Узбакистон ҳамчунон молҳои мавриди ниёзи сохтмони Роғунро иҷозаи убур аз қаламрави худ намедиҳад ва масъулини ин сохтмон маҷбуранд, барои ворид намудани таҷҳизот аз роҳҳои дигар, аз ҷумла аз роҳи ҳавоӣ истифода кунанд.
Ин таҷҳизот ва мошинолот ба гуфтаи оқои Шулашов эҳтимолан аз тариқи ҳарими ҳавоии Афғонистон вориди Тоҷикистон шавад.
Нурулло Шулашов мегӯяд, ки шиддати корҳои сохтмонӣ дар неругоҳи Роғун ба далели норасоии маслоҳели зарурӣ барои идомаи сохтмон коҳиш пайдр кардааст.
Нурулло Шулашов, раҳбари сохтмони неругоҳи Роғун гуфт, аз аввали соли равон то кунун Ӯзбакистон иҷозаи убури вагонҳои марбут ба нерӯгоҳи Роғунро надодааст.
Узбакистон ба сохтмони неругоҳи Роғун ба шиддат мухолиф аст. Мақомоти он кишвар даъво доранд, ки дар сурати анҷоми сохтмони обанбори неругоҳи Роғун бо баландии 335 метр заминҳои зиёде дар кишварҳои поёноб, аз ҷумла Узбакистон ба биёбон табдил мешавад.
Аммо Тоҷикистон чунин даъворо рад мекунад ва мегӯяд, ки қасд надорад маҷрои оби рӯдхонаҳоро барои ҳамсояҳои худ бибанданд. Ва сохтмони неругоҳои Роғун ба нафъи кишварҳои поёноб низ ҳаст.
Давлати Тоҷикистон ҳамчунон ба қасди худ барои сохтмони Роғун идома дода ва дар буҷа соли ояндаи кишвар ҳудуди 200 миллион доллар барои сохтмони Роғун ихтисос додааст.