Среда-Чоршанбе
13.12.2017
03:52
Приветствую Вас Мехмон
RSS
 

Ворух это рай на земле!

Главная Регистрация Вход

Меню сайта

Разделы новостей
Экономика [64]
Общество [170]
Культура [34]
Политика [60]
Новости дня [50]
Спорт [21]
В Мире [34]

Мини-чат
500

Наш опрос
Какую музыку Вы любите-Кадом намуди мусиқиро дуст медоред?
Всего ответов: 343

Поиск-Ҷустуҷуй

Главная » 2011 » Август » 9 » Суханронии Президенти Ҷумҳурии Тоҷикистон Эмомалӣ Раҳмон дар мулоқот бо сокинони ноҳияи Исфара
Суханронии Президенти Ҷумҳурии Тоҷикистон Эмомалӣ Раҳмон дар мулоқот бо сокинони ноҳияи Исфара
11:23
Ҳозирини мўҳтарам!
Ҳамдиёрони гиромӣ!

Баъди чанд рўз мардуми шарифу сарбаланди Тоҷикистон бистсолагии истиқлолияти давлатии кишвари азизамон – муқаддастарин дастоварди таърихи навини худро бо шукўҳу шаҳомати хоса таҷлил менамоянд. Сокинони заҳматпешаи вилояти Суғд мисли тамоми ҳамватанони худ бо тамоми ҳастӣ дарк менамоянд, ки истиқлолият бузургтарин неъмати ҳастӣ, шарти асоситарини давлатдории мустақил, шарафу номуси ватандорӣ, кафолати хонаи обод ва нерўи таконбахши ҳамаи ҷабҳаҳои ҳаёти давлат ва ҷомеа мебошад.

Мо рўҳияи идона ва азми қавии мардуми вилоятро ду рўз аст, ки хуб мушоҳида мекунем.

Бо истифода аз фурсати муносиб ҳамаи шумо – ҳозирини гиромӣ ва кулли сокинони чашмикордону меҳмоннавози ноҳияи Исфараро ба ифтихори ҷашни муқаддаси бистумин солгарди истиқлолияти давлатии Тоҷикистон самимона табрик гуфта, бароятон саломативу саодатмандӣ, рўзгори орому осуда, хонаи ободу дастурхони фаровон ва сарбаландиву сарфарозиҳо орзу менамоям.

Имрўзҳо дар саросари кишвар корҳои созандагиву бунёдкорӣ идома дошта, ба истиқболи ин ҷашни бузург садҳо иншооти гуногун сохта шуда, мавриди баҳрабардории мардум қарор гирифта истодаанд.

Дастовардҳои иҷтимоиву иқтисодии кишвар ин натиҷаи меҳнату заҳмати сокинони ҳар як шаҳру ноҳияи мамлакат мебошад. Бо вуҷуди мушкилоту монеаҳои зиёд мардуми шарифи мо тавонистанд, ки дар замони истиқлолият ба пешрафти тамоми соҳаҳои ҳаёт ноил гарданд.

Соҳаҳои иқтисодиву иҷтимоии шаҳри Исфара дар даврони соҳибистиқлолии давлат дар баробари дигар шаҳру навоҳии кишвар ба таври назаррас тараққӣ карданд.

Аз соли 1995 то инҷониб аз ҳамаи манбаъҳои маблағгузориҳои буҷети давлатӣ барои тараққиёти шаҳри Исфара беш аз 160 миллион сомонӣ ҷудо карда шудааст, ки он барои рушди соҳаҳои ҳифзи иҷтимоӣ, сохтмони иншоот, роҳҳо ва дастгирии буҷети шаҳр равона карда шудааст.

Имрўз дар қаламрави шаҳри Исфара 11 лоиҳаи сармоягузорӣ ба маблағи қариб 19 миллион сомонӣ амалӣ шуда истодааст, ки асосан барои ҳалли масъалаҳои иҷтимоӣ, паст кардани сатҳи камбизоатӣ, таъсиси хоҷагиҳои деҳқонӣ, таҳким ва рушди инфраструктураи гумрук, баланд бардоштани дастрасӣ ба хизматрасониҳои тиббӣ ва рушди деҳот равона карда шудаст.

Дар баробари ин, тибқи созишномаҳои нави сармоягузорӣ дар соли оянда дар ҳудуди шаҳри Исфара татбиқи боз як лоиҳа оид ба беҳтар намудани обтаъминкунии аҳолӣ ба маблағи умумии беш аз 15 миллион сомонӣ оғоз мегардад.

Дар ин давра дар шаҳри Исфара дар самти рушди фаъолияти бонкҳо ва ташкилотҳои қарзӣ низ пешравиҳои зиёд ба назар мерасанд.

Айни замон қариб ҳамаи ташкилотҳои бонкии кишвар аз рўи тамоми намудҳои амалиёти бонкӣ ба аҳолии шаҳр доир ба пардохти маблағҳои аз хориҷи кишвар интиқолшаванда, хизматрасонии корхонаҳои саноатӣ ва хоҷагиҳои деҳқонӣ, додани нафақа ва пешниҳоди қарзҳои гуногун барои хоҷагиҳои деҳқонӣ ҷиҳати истеҳсоли маҳсулоти кишоварзӣ ва дастгирии соҳибкории хурду миёна хизмат мерасонанд.

Тибқи супориши ҳукумати мамлакат барои рушди иҷтимоиву иқтисодии маҳалҳои дурдасти кўҳистон дар Исфара низ раванди қарздиҳии хурд бомаром афзоиш ёфта, аз 3,7 миллион сомонӣ дар соли 2005 то 26 миллион сомонӣ дар соли 2010 зиёд шудааст ва ин нишондиҳанда ҳоло ба 30 миллион сомонӣ баробар гардидааст.

Дар баробари ин, ҳукумати мамлакат бо мақсади дастгирӣ ва рушди соҳибкорӣ ислоҳоти амиқи иқтисодиро амалӣ намуда, заминаи мусоиди меъёрии ҳуқуқии онро фароҳам овардааст, ки дар натиҷа соҳибкорӣ дар шаҳри Исфара рушд намуда, дар заминаи таҷдиди собиқ 12 хоҷагиҳои давлативу коллективӣ беш аз 600 хоҷагиҳои деҳқониву оилавӣ фаъолият намуда истодаанд.

Ҳамин тавр, ҳоло дар ноҳия беш аз 3 ҳазор субъектҳои хурду бузурги соҳибкорӣ фаъолият доранд.

Дар ноҳия дар давоми солҳои истиқлолият майдони боғу токзор ба масоҳати 1400 гектар зиёд шуда, ҳамасола истеҳсол ва содироти бефосилаи меваи хушк ба хориҷи кишвар таъмин шуда истодааст.

Агар дар соли 2010 аз шаҳри Исфара наздик 38 ҳазор тонна мева ва маҳсулоти коркарди он содирот шуда бошад, пас танҳо дар нимсолаи аввали соли ҷорӣ аз шаҳри Исфара зиёда аз 20 ҳазор тонна меваҳои гуногун, аз ҷумла зардолуву меваҳои хушк ба маблағи 38 миллион сомонӣ ба хориҷи кишвар бароварда шудааст, ки ин қариб 60 фоизи содироти меваи вилоятро ташкил медиҳад.

Деҳқонони Исфара дар кишвар ва берун аз он бо таҷрибаи зиёди боғу токпарварӣ ва сабзавоткорӣ шўҳрати хоса дошта, имрўз мактаби таҷрибаи пешқадам барои дигар ноҳияҳои мамлакат гардидаанд.

Дар баробари боғпарварӣ минбаъд зарур аст, ки ба картошкапарварӣ ва таъмини хоҷагиҳои дигар бо тухмии хушсифати зироатҳо низ аҳамияти махсус дода шавад.
Дар ин самт коркарди пурраи ҳосили рўёнидашуда, ки ҷавобгўи талаботи байналмилалӣ мебошад ва муаррифии сазовори онҳо ҳамчун моли кишвари Тоҷикистон зарур аст. Дар натиҷа содироти бонизоми он афзоиш ёфта, ҳазорҳо ҷойи нави корӣ ташкил мегардад, ки ин албатта боиси болоравии сатҳу сифати зиндагии мардум мегардад.

Дар давоми солҳои истиқлолият нишондиҳандаҳои иҷтимоиву иқтисодии ноҳия бемайлон афзоиш ёфта, истеҳсоли ғалла 2,3 баробар, картошка 1,2 баробар ва полезиҳо, ки қаблан қариб вуҷуд надошт, то 690 тонна расида, инчунин чорводорӣ ва парандапарварӣ низ ба таври назаррас тараққӣ кардааст.

Дар доираи барномаи давлатии рушди соҳаи боғу токпарварӣ барои солҳои 2010-2014 беш аз 214 гектар боғҳои нав бунёд ва 145 гектар боғҳои кўҳна барқарор карда шудаанд. ҳоло майдони умумии боғу токзори шаҳри Исфара қариб 9 ҳазор гектар мебошад.

Бинобар иқлими мусоиди Исфара барои боғу токпарварӣ кишоварзону мутахассисонро зарур аст, ки ҷиҳати ба даст овардани нишондиҳандаҳои боз ҳам баландтари соҳа ҳамаҷониба чораҷўӣ намуда, нигоҳубин ва самаранокии боғу токзорҳои мавҷударо таъмин намоянд.

Маҳз дар замони истиқлолият дар Исфара қариб 3 ҳазор гектар заминҳои нав азхуд гардида, дар майдони 1675 гектар боғҳои нав бунёд карда шудаанд.
ҳанўз соли 1992 бунёди пойгоҳи обкашии «Моҳпарӣ» барои азхудкунии заминҳои бекорхобидаи мавзеи Моҳпарӣ дар масоҳати беш аз 2 ҳазор гектар оғоз ёфта, бо дастгирии ҳукумати мамлакат ҳоло он ба як мавзеи ободи зисти аҳолӣ ва манбаи ҳосили фаровону шаҳдбори зардолу мубаддал гардидааст.

Танҳо дар давоми даҳ соли охир барои обёрӣ намудани ин мавзеъ қариб 600 ҳазор сомонӣ маблағҳои буҷетӣ азхуд шуда, барои барқарорсозии истгоҳҳои обкашии он азхудкунии боз 300 ҳазор сомонӣ аз ҳисоби маблағҳои марказонидашудаи соҳаи мелиоратсия идома дорад.

Вобаста ба ин, таъкид месозам, ки таҷрибаи пешқадами деҳқонони асили як қатор ҷамоатҳои ноҳия дар бобати азхудкунӣ ва ба боғу киштзор табдил додани заминҳои бекорхобидаи санглох шоёни дастгирӣ ва намунаи истифодаи самараноки замин мебошад.

Дар давоми солҳои истиқлолият ҳукумати мамлакат ҳалли масъалаҳои иҷтимоии аҳолӣ ва баланд бардоштани сатҳи зиндагии шаҳрвандони кишварро ҳамеша дар мадди аввал мегузорад.

Ба ин мақсад дар ин давра дар мавзеъҳои Бинокору Сомониён ва як қатор маҳаллаҳои ҳудуди шаҳр, инчунин дар як қатор ҷамоатҳои деҳот оилаҳои ҷавону эҳтиёҷманд бо қитъаҳои замин барои сохтмони манзилҳои истиқоматӣ таъмин гардида, танҳо дар соли 2010 тибқи қарори ҳукумати Тоҷикистон барои қариб 6 ҳазор оила ё ба таври дигар барои беш аз 40 ҳазор нафар сокинони шаҳру деҳоти Исфара 657 гектар замин ҷудо карда шуд.

То имрўз беш аз 2 ҳазор оилаҳои эҳтиёҷманд бо қитъаҳои замини наздиҳавлигӣ таъмин гардида, тақсимоти замини наздиҳавлигӣ бо ҷалби комиссияҳои ҷамъиятӣ идома дорад.

Дар робита ба ин, мехоҳам хотирррасон намоям, ки ҳадаф аз ташкили комиссияҳои ҷамъиятӣ тақсимоти одилонаи заминҳои наздиҳавлигӣ ба шахсони воқеан эҳтиёҷманд мебошад ва шахсони масъул, инчунин комиссияҳои ҷамъиятӣ бояд масъулияти ба онҳо вогузоршударо софдилона ва боадолатона иҷро намоянд.

Ҳозирини гиромӣ!

Бо дарназардошти он, ки Исфара яке аз ноҳияҳои асосии саноатии кишвар мебошад, инчунин бо дарки амиқи мақоми саноат дар рушди иқтисодиву иҷтимоии мамлакат ҳукумати Тоҷикистон аз солҳои аввали истиқлолият ба фаъолияти мунтазами корхонаҳои саноатии кишвар, аз ҷумла корхонаҳои саноатии шаҳри Исфара таваҷҷўҳи махсус зоҳир намуда, ҷиҳати эҳё намудану тараққӣ додан ва дигаргунсозии истеҳсолоти ватанӣ пайваста чораҷўӣ намуда истодааст.

Дар натиҷа, аз соли 2001 инҷониб суръати пастравии истеҳсолоти саноатии ноҳия боздошта шуда, ҳоло дар корхонаи «Тамохуш» истеҳсоли маҳсулоти пурқимати саноатии молибден, никел ва хатти коркарди ваннадий барқарор ва дар заминаи иқтидорҳои мавҷудаи корхонаи «Химзавод» якчанд истеҳсолоти нав ба роҳ монда шуд. ҳамзамон бо ин, дар корхонаи «Ангишт» технологияи коркарди брикет аз хокаи ангишт ва дар заминаи корхонаи «Чароғ» истеҳсоли чароғҳои каммасрафи «Ориённур» бо тарҳу намудҳои гуногун ташкил карда шудааст. ғайр аз корхонаҳои мавҷуда боз 5 корхонаи коркарди меваю сабзавот ва корхонаи сементбарорӣ ба фаъолият оғоз намуданд.

Агар дар соли 1990 дар шаҳри Исфара 17 корхонаи саноатӣ фаъолият дошта бошад, пас дар замони истиқлолият 23 корхонаҳои нави хурду калон сохта шудаанд. ҳоло дар шаҳри Исфара 38 корхона, аз ҷумла 20 корхонаи калон ва 18 корхонаи хурд фаъолият дорад.

Илова бар ин, ҳукумати мамлакат ҷиҳати афзун намудани истихроҷу коркарди нафту газ ва таъмини ҳарчи бештари талаботи иқтисодии кишвар бо сўзишвории ватанӣ фаъолияти корхонаи “Петролеум Суғд”-ро ба роҳ мондааст. ҳоло дар ҳудуди майдони Маҳрам қариб 60 фоизи корҳои чоҳкобиву пармакунӣ иҷро шудааст.

Соли ҷорӣ барои идомаи корҳои пармакунӣ аз буҷети давлатӣ 3,5 миллион сомонӣ ҷудо гардидааст ва умед аст, ки иктишофу истихроҷи захираҳои саноатии нафту гази ин майдон боиси рушди минбаъдаи иҷтимоиву иқтисодии Исфара хоҳад шуд.

Умуман, истеҳсоли маҳсулоти саноатӣ дар шаҳри Исфара дар давоми 10 соли охир беш аз 3 маротиба афзоиш ёфтааст. ғайр аз ин, дар замони истиқлолият ба соҳаи сохтмони ноҳия аз ҳисоби ҳамаи сарчашмаҳо қариб 100 миллион сомонӣ маблағҳои асосӣ равона гардида, ба маблағи беш аз 50 миллион сомонӣ фондҳои асосӣ ба кор дароварда шудаанд.

Маҳз амалишавии барномаҳои рушди иҷтимоиву иқтисодии мамлакат имконият фароҳам овард, ки дар замони истиқлолияти давлатӣ дар ноҳияи Исфара қариб 20 ҳазор ҷойҳои нави корӣ ташкил карда шуда, танҳо тавассути мақомоти давлатии шуғли аҳолӣ беш аз 7 ҳазор нафар корҷўён бо ҷойи кор таъмин карда шудаанд.

Мақсади асосии татбиқи чорабиниҳо доир ба рушди саноати Исфара таъмини истифодаи пурраи иқтидорҳои мавҷуда, тағйири сохтори истеҳсолии корхонаҳои саноатӣ, ташкили корхонаҳои нав, аз ҷумла корхонаҳои истеҳсоли маҳсулоти бинокорӣ, коркарди пурраи маҳсулоти кишоварзӣ ва дар ин замина таъмин намудани рушди соҳаҳои иҷтимоӣ ва фароҳам овардани ҷойҳои нави корӣ мебошад.

Аз ин рў, мақомоти иҷроияи ҳокимияти давлатии шаҳр ва вазорату идораҳои дахлдорро зарур аст, ки ҷиҳати пурра ба кор даровардани ҳамаи корхонаҳои саноатӣ ва истифодаи ҳарчи васеи имконияту иқтидорҳои мавҷуда мунтазам чораҷўӣ намоянд.

Ҳамзамон бо ин, ҳукумати мамлакат ҷиҳати расидан ба истиқлолияти энергетикии кишвар дар баробари сохтмони иншооти бузургу миёнаи энергетикӣ Барномаи дарозмуддати бунёди силсилаи нерўгоҳҳои барқи обии хурд барои солҳои 2009-2020 –ро амалӣ намуда истодааст. Дар доираи ин барнома бунёди нерўгоҳҳои хурди барқи обӣ дар деҳаҳои Ворух ва Чилгазӣ дар давоми солҳои 2012-2015 ба маблағи умумии беш аз 9 миллион сомонӣ ба нақша гирифта шудааст, ки ҳоло корҳои лоиҳакашии онҳо амалӣ шуда истодаанд.

Дўстони азиз!

Дар давраи истиқлолияти давлатии кишвар соҳаҳои иҷтимоии шаҳри Исфара, аз ҷумла маорифу тандурустӣ ва фарҳанг низ ба дастовардҳои назаррас ноил шудаанд. Дар ин давра дар ноҳия 72 иншооти соҳаи маориф, аз ҷумла мактабҳои наву синфхонаҳои иловагӣ барои беш аз 11 ҳазор ҷойи нишаст сохта, ба истифода дода шуда, корҳои лоиҳакашиву сохтмони бинои иловагии мактаби №28 барои 480 ҷойи нишаст ва мактаби нав дар мазеи Моҳпарӣ барои 480 ҷойи нишаст идома доранд.

Дар баробари маблағгузориҳои буҷети давлатӣ дар барқарорсозӣ ва бунёди муассисаҳои маорифу тандурустии ноҳия саҳми соҳибкорону шаҳрвандони ноҳия низ зиёд мебошад.

Сармоягузорӣ ба рушди маорифу тандурустӣ беҳтарин амали хайру савоб барои фардои миллату Ватан мебошад. Аз ин лиҳоз бо истифода аз фурсати муносиб ба ҳамаи онҳое, ки дар сохтмону таъмири муассисаҳои маорифу тандурустии кишвар ва умуман рушди ин соҳаҳо ҳиссаи сазовор доранд, изҳори сипос менамоям.

Ҳоло дар 83 муассисаи таълимии Исфара, аз ҷумла 69 мактаби таҳсилоти миёнаи умумӣ, 4 мактаби таҳсилоти умумии асосӣ ва 8 литсей беш аз 3 ҳазор нафар омўзгорон ба зиёда аз 48 ҳазор нафар хонандагон таълиму тарбия дода истодаанд.
Ҳамасола садҳо нафар хатмкунандагони мактабҳои шаҳри Исфара тавассути квотаи Президентӣ ва инчунин бо донишу малакаи худ сазовори номи донишҷў гардида, дар мактабҳои олии кишвар ва берун аз он таҳсил карда истодаанд.

Ҳукумати мамлакат ба масъалаҳои беҳтар намудани шароити моддиву маишии кормандони бахшҳои иҷтимоӣ, аз ҷумла омўзгорону табибон аҳамияти махсус медиҳад ва мо ин равандро тавассути марҳала ба марҳала баланд бардоштани маоши кормандон ва татбиқи чораҳои дигар минбаъд низ идома медиҳем.

Ҳамзамон ба ин, дар замони истиқлолият дар шаҳри Исфара сохтмони Маркази тиҷоративу фарҳангии «Ориён» бо 200 ҷойи нишаст, майдони теннис, саҳна ва толори тобистонаи консертӣ бо 2500 ҷойи нишаст, таъмири асосии Кохи фарҳанг, осорхонаи таърихӣ-кишваршиносӣ, Маркази қабул ва пахши барномаҳои радиои ҷумҳурӣ, пули роҳи мошингарди Исфара-Чоркўҳ дар деҳаи Чорқишлоқ, сохтмони бисёр хонаҳои истиқоматӣ ва бунёди маҳалҳои нави аҳолинишин аз ҷумлаи самараҳои неки раванди созандагиву бунёдкорӣ мебошанд.

Ҳамчунин бунёди майдони марказии шаҳр, тармими роҳу пулҳо, муассисаҳои таълимиву табобатӣ ва умуман сохтмону таъмир ва азнавсозии зиёда аз 200 иншооти ҳаётан муҳими иҷтимоӣ натиҷаҳои даврони соҳибистиқлолии Тоҷикистон мебошанд.

Соли равон роҳи мошингарди Исфара – Чоркўҳ таъмиру барқарор карда шуда, дар ин самт ба мақомоти иҷроияи ҳокимияти давлатии шаҳр якҷо бо Вазорати нақлиёт зарур аст, ки ҷиҳати беҳтар намудани ҳолати роҳҳои ноҳия бо истифода аз ҳамаи имкониятҳои мавҷуда чораҷўӣ намоянд.

Дар баробари ҳалли масъалаҳои иҷтимоиву иқтисодии маҳалҳои ноҳия ҳукумати Тоҷикистон ба эҳёву рушди минбаъдаи шаҳраки Шўроб аҳамияти махсус зоҳир намуда истодааст. Бо ин мақсад ҳоло “Нақшаи барқарорсозӣ ва рушди иҷтимоиву иқтисодии шаҳраки Шўроб барои солҳои 2011-2015” мавриди баррасӣ қарор дорад. Аз 74 лоиҳаи ба нақшаи мазкур пешниҳодшуда дар марҳалаи аввал 30 лоиҳа ба маблағи беш аз 26 миллион сомонӣ, аз ҷумла 15 лоиҳа ба маблағи беш аз 8 миллион сомонӣ дар бахши иқтисодӣ, 15 лоиҳа ба маблағи 15,3 миллион сомонӣ дар бахши инфраструктура ва 44 лоиҳа ба маблағи қариб 3 миллион сомонӣ дар бахши иҷтимоӣ амалӣ карда мешавад.

Иҷрои ҳадафҳои мазкур имкон медиҳад, ки масъалаҳои таъминоти аҳолӣ бо оби нўшокӣ, сохтмон ва барқарорсозии инфраструктураи иҷтимоӣ ва иншооти маорифу тандурустӣ, азхудкунии иловагии заминҳои мавзеи Моҳпарӣ ва ташкили ҷойҳои нави корӣ ҳалли худро пайдо намуда, як қисми сокинони аҳолии ҷамоатҳои сераҳолии ноҳия ба шаҳраки Шўроб кўчонида шаванд. Амалишавии иқдоми мазкур ба беҳтар намудани вазъи иҷтимоиву иқтисодии аҳолии ҷамоатҳои Чоркўҳ, Ворух, Сурх ва дигар ҷамоатҳои ноҳия мусоидат хоҳад кард.

Ҳамдиёрони азиз!

Сокинони Исфара табиатан мардуми созандаву бунёдкор, оромтабиату нексиришт ва меҳнатдўст мебошанд.

Ҳукумати Тоҷикистон ба шарофати истиқлолияти миллӣ ва сулҳу суботи ҷомеа ҷиҳати фароҳам овардани шароити мусоид барои соҳибкориву тиҷорат ҳамаи чораҳои заруриро амалӣ намуда истодааст. Ин аст, ки сокинони шаҳри Исфара натиҷаи заҳмати худро чи дар дохил ва чи дар хориҷи кишвар озодона ба фурўш бароварда, сатҳи зиндагии оилаҳои худро торафт беҳтар карда истодаанд.
Бинобар ин, мову шумо бояд ҳамеша шукрона кунем, ки соҳибдавлату соҳибихтиёр ҳастем ва тақдири давлати худро ба даст гирифтаем.

Ба шукронаи соҳибдавлатӣ ҳар яки мо бояд масъалаҳои тарбияи ватандўстии ҷавонон, хизмати садоқатмандона ба модар - Ватан ва созандагиву ободкории сарзамини аҷдодӣ, инчунин риояи қонун ва волоияти қонунро ҳамеша дар мадди назар дошта бошем, ҳушёриву зиракии сиёсиро аз даст надиҳем ва зиёдаравӣ накунем.

Зеро сулҳу субот ва авзои орому осудаи ҷомеа пояи асосии рушди минбаъдаи иҷтимоиву иқтисодӣ ва пешрафти тамоми соҳаҳои ҳаёт мебошад.

Мову шумо дар давоми бист соли истиқлолият озмоишҳои гуногуни тақдир ва имтиҳонҳои вазнини зиндагиро паси сар намуда, таҷрибаву малака ва сабақҳои ибратомўзи рўзгорро пайдо намудем. Имрўз ҳар як фарди бонангу номус ва ватандўсту ватанпараст бояд барои ободиву тараққиёти Ватани азизамон содиқона заҳмат кашад ва барои фардои дурахшони миллату давлат ҳиссаи сазовори худро гузорад.

Бо ҳамин умедҳои нек бори дигар мардуми бонангу номус ва заҳматкашу ҳимматбаланди Исфараро ба ифтихори бистумин солгарди соҳибдавлативу соҳибистиқлолӣ самимона табрик гуфта, ба ҳар як хонадон ободиву осудагӣ ва саломативу хушбахтиҳо орзу менамоям.

Ҳамеша саломату сарбаланд бошед!
Категория: Общество | Просмотров: 1251 | Добавил: Мухочир | Рейтинг: 3.0/1 |
Всего комментариев: 3
3  
Хамин вохурихову баромадхо ва тарзи пешвози президент ба ман солхои 80-85 -уми асри 20 ёдрас кард. Айнан методхову усулхои коммунисти. Чи хеле когаз аз амал дур буд холо хамоно бадтар аст ку бех не!

2  
Ба фикрам таъмири бесифат ва хамаги 20 кмраи рох лоики нутки президенти кишвар нест! О ина раиса шахр дар баромадаш мегуфт ба хайр буд. Хайр таксими одилонаи заминро хама медонад хочат ба ин гап нест. ГЭС дар худи вактхои Шомирсаидов сар шуду холо хам лоиха мекашанд)))) Ба муалифи нутки президент "ДУ"-и калон. Бовар кунед меарзад бо он ракамхои хавоиау ситоиши хавои холиаш.

1  
Дар робита ба ин, мехоҳам хотирррасон намоям, ки ҳадаф аз ташкили комиссияҳои ҷамъиятӣ тақсимоти одилонаи заминҳои наздиҳавлигӣ ба шахсони воқеан эҳтиёҷманд мебошад ва шахсони масъул, инчунин комиссияҳои ҷамъиятӣ бояд масъулияти ба онҳо вогузоршударо софдилона ва боадолатона иҷро намоянд.
Соли равон роҳи мошингарди Исфара – Чоркўҳ таъмиру барқарор карда шуда, дар ин самт ба мақомоти иҷроияи ҳокимияти давлатии шаҳр якҷо бо Вазорати нақлиёт зарур аст, ки ҷиҳати беҳтар намудани ҳолати роҳҳои ноҳия бо истифода аз ҳамаи имкониятҳои мавҷуда чораҷўӣ намоянд.Ҳамзамон бо ин, ҳукумати мамлакат ҷиҳати расидан ба истиқлолияти энергетикии кишвар дар баробари сохтмони иншооти бузургу миёнаи энергетикӣ Барномаи дарозмуддати бунёди силсилаи нерўгоҳҳои барқи обии хурд барои солҳои 2009-2020 –ро амалӣ намуда истодааст. Дар доираи ин барнома бунёди нерўгоҳҳои хурди барқи обӣ дар деҳаҳои Ворух ва Чилгазӣ дар давоми солҳои 2012-2015 ба маблағи умумии беш аз 9 миллион сомонӣ ба нақша гирифта шудааст, ки ҳоло корҳои лоиҳакашии онҳо амалӣ шуда истодаанд.


Добавлять комментарии могут только зарегистрированные пользователи.
[ Регистрация | Вход ]
Форма входа-Шакли даромад

Календарь новостей
«  Август 2011  »
ПнВтСрЧтПтСбВс
1234567
891011121314
15161718192021
22232425262728
293031

Сурати нав      

Друзья сайта


Статистика

Онлайн всего: 1
Гостей-Мехмонхо: 1
Пользователей: 0


Copyright MyCorp © 2017