Дар шарқи Тоҷикистон як чархболи Горди миллии кишвар суқат кардааст, ки бар асари ин ҳодиса чаҳор нафар кушта шудаанд. Масъулини маркази матбуоти Горди миллии Тоҷикистон зимни тайиди ин хабар ба Озодӣ гуфтанд, тибқи маълуоти қаблӣ сабаби суқути чархбол мушкили фаннӣ аст. Бино ба хабари маркази матбуоти Горди миллии Тоҷикистон ин чархбол ба ҳангоми иҷрои вазифаи хидматӣ суқут кардааст. Ҳар чаҳор нафари кушташуда халабонони ин чархбол мебошанд.
Ҳамчунин чаҳор корманди дигари техникӣ низ маҷрӯҳ ва ба бемористон мунтақил шудаанд.
Дар шарқи Тоҷикистион амалиёти алайҳи нерӯҳои мусаллаҳи ғайри қонунӣ ҷараён дорад. Ин амалиёт ба думболи ҳамла ба корвони нерӯҳои вазорати дифоъ дар рӯзи 19 -уми август оғоз шуд ва ҳамчунон идома дорад. Дар ин ҳамала 26 сарбози Артиши Тоҷикистон кушта шуд. Мақомот ин ҳамларо бар дӯши Алии Бедакӣ (Аловуддин Давлатов) ва Мулло Абдулло (Абдулло Раҳимов) аз фармондеҳони пешини мухолифин вогузор кардаанд.
Дар амалиёти алайҳи ин нерӯҳо то кунун чандин сарбозу афсари дигари мақомотҳои қудратии Тоҷикистон низ кушта шудаанд.
Мақомот ҳамчунин аз кушта шудани ҳафт нафар аз аъзои гурӯҳҳои мусаллаҳи ғайри қонунӣ хабар дордаанд.
Аммо масъулини Горди миллӣ мегӯянд, суқути чархболи мазкур дар субҳи имрӯз ба ҷараёни амалиёти алайҳи нерӯҳои мусаллаҳ рабте надорад.