Вазорати дохилаи Тоҷикистон мегӯяд, ки дар пайи як амалиёти низомӣ дар водии Рашт панҷ узви гурӯҳи марбут ба фармондеҳи пешини нирӯҳои мухолифин Мирзохӯҷа Аҳмадов кушта шуда Сарнавишти худи ӯ ҳоло муайян нест. Баъди зӯҳри имрӯз нирӯҳои интизомии Тоҷикистон дар водии Рашт амалиёти густардаи ҷӯстуҷӯи террористонро шурӯъ карданд. Интерфакс бо такя ба манобеи ҳифзи қонун мегӯяд, ки амалиёт баъди он шурӯъ шуд, ки дар шарқи Тоҷикистон гурӯҳои иборат аз афроди низомӣ ошкор шуданд. Як манбаъ ба ин хабаргузорӣ гуфтааст, ки “мо намехоҳем ба куштори дуюми монанд ба оне, ки рӯзи якшанбе рӯй дод, роҳ диҳем. Амалиёт шурӯъ шуд”.
Дар ҳамин ҳол, Шералӣ Хайруллоев, вазири дифоъ дар сӯҳбат бо Итар-Тасс гуфтааст, ки дар амалиёти имрӯзаи “поккорӣ артиш иштирок намекунад, чунки вазифаҳои дигарро ба дӯш дорад”. Вале бо зикри ин, вазири дифоъ аз додани тафсилоти бештар худдорӣ кардааст.
Нирӯҳои амниятӣ талош доранд аъзои гурӯҳҳои террористии таҳти раҳбарии фармондеҳои собиқи мухолифин Абдулло Раҳимов ва Алоуддин Давлатовро боздошт кунанд, ки дар куштори 25 нафар сарбозону афсарони артиши Тоҷикстон дар рӯзи 19 сентябри имсол дар дараи Камароб айбдор мешаванд. Ба иттилои расонаҳои хабарӣ имрӯз баъд аз зӯҳр хатти иртиботи телефонӣ бо водии Рашт қатъ шудааст.
|
