Субҳи имрӯз дар бинои шӯъбаи минтақавии мубориза бо ҷиноёти созмонёфтаи Раёсати корҳои дохилии вилояти Суғд инфиҷор (таркиш-террор) ба амал омадааст. Хабарнигори Озодӣ гузориш медиҳад, ки нерӯҳои интизомӣ ҷодаҳоро зери назорат гирфитаанд, вале маълумоте аз куштаву захми ин ҳодиса то кунун дар даст нест. Ин таркиш ҳудуди соати 8 субҳ ба вуқӯъ пайваста аст ва феълан сохтмони шӯъбаи мубориза бо ҷинояткории созмонёфта ва ё ба истилоҳ УБОП дар коми оташу дуд аст. Гуфта мешавад, ки маводи мунфаҷир дар як мошин ҷо гузошта шуда ва ин мошин дар назди бинои шӯъбаи мубориза бо ҷиноёти созмонёфта мунфаҷир шудааст. Бино ба гузоришҳои то ҳол тайднашуда бар асари ин ҳодисаи таркиш ҳадди ақал даҳ нафар маҷрӯҳ ва ба бемористон мунтақил шудаанд. Мақомоти раёсати корҳои дохилии Суғд хабари инфиҷорро тайид кардаанд. Бино ба гузоришҳо, чанд нафар аз хабарнигорони расонаҳои маҳаллӣ ва марказӣ, ки ба ҷойи ҳодиса назик шуда ва мехостанд гузориши таҳия кунанд, аз сӯи нерӯҳои милиса боздошт ва ба милисахона бурда шудаанд. Дар миёни ин хабарнигорон Қамари Аҳрор, хабарнигори Озодӣ низ ҳаст, ки нахустин хабари инфиҷорро ба мо гузориш дода буд. Гуфта мешавад, дастгоҳҳои сабту навори ин хабарнигорон аз сӯи нерӯҳои интизомӣ забт шудааст. Тафсилот нашр мешавад.
|