Кумитаи давлатии амнияти миллии Тоҷикистон аз боздошти се гумонбар ба таркиши Хуҷанд иттилоъ дод. Маркази равобит ҷамъиятии раёсати амнияти вилояти Суғд зимни пахши як баёния гуфтааст, ба хотири халал ворид накардан ба тафтишот исми ин афрод ошкор намешавад. Дар ин баёния омадааст, "таҳқиқро як гурӯҳи вижаи ҷустуҷӯии фаврии додситонии Суғд анҷом медиҳад".
Таркиш субҳи 3 сентябри соли равон дар бинои шӯъбаи мубориза бар ҷиноятҳои созмонёфтаи вилояти Суғд ба вуқӯъ пайваст. Як мошини тамғаи "Волга" бо суръат ба дарвозаи шӯъба ворид шуда, таркид. Дар бораи сарнишини ин мошин иттилоот зиддунақизанд. Мақомот то ба ҳол дар ин маврид изҳори назар накардаанд. Тибқи баъзе хабарҳо сарнишини «Волга» нафари худкуш будааст.
Ба гуфтаи шоҳидони айнӣ, таркиш ба ҳадде сахт буд, ки шикастапораҳои автомобил то садҳо метр парида, шишаи тирезаҳои биноҳои атроф то ҳудуди 500 метр шикаста, фурӯ рехтаанд.
Вазорати корҳои дохилаи Тоҷикистон бар асари таркиш кушта шудани 4 нафар ва захмӣ шудани 21 нафарро таъйид кард, ки аксарият кормандони милиса будаанд. Аммо тибқи манобеъи ғайрирасмӣ, теъдоди кушташудагон аз 10 нафар ва захмиён аз 30 нафар боло гуфта мешавад.
Вазорати корҳои дохилии Тоҷикистон бо нашри як баёния ҳодисаи таркиш дар Хуҷандро шарҳ дода, гуфт, ки бо эҳтимоли зиёд "амали мазкур аз тарафи ҳаммаслакони гумонбаршудагон ба куштори раиси собиқи бозори Исфара Ҳомидҷон Каримов, ки эҳтимоли ба Ҳаракати исломии Узбакистон мансуб буданашон мавҷуд аст, содир карда шудааст".
Аз рӯи ин ҳодиса додситонии вилояти Суғд аз рӯи моддаи куштор ва терроризми Кодекси ҷиноии Тоҷикистон парванда боз кардааст.
