| Вазорати корхои дохилии Тоҷикистон аз боздошти Низомхон Ҷӯраев, собиқ раиси корхонаи кимиёи Исфара ва узви Маҷлиси вакилони вилояти Суғд иттилоъ дод. Вазорати дохилӣ мегӯяд, Низомхон Ҷӯраев дар шаҳри Маскав аз сӯи мақомоти амниятии Русия бо дархости Тоҷикистон дастгир шудааст. Маҳмадулло Асадуллоев, сухангӯи вазорати корҳои дохилии Тоҷикистон, мегӯяд, Низомхон Ҷӯраев рӯзҳои наздик ба Душанбе истирдод хоҳад шуд. Низомхон Ҷӯраев ҳамроҳ бо даҳҳо нафар ҳамроҳонаш аз сӯи Додгоҳи олӣ ба содир кардани ҷиноятҳои вазнин муттаҳам шудааст. Вале ӯ пас аз боз шудани парванда дар соли 2007 ба хориҷи кишвар фирор кард ва то ҳол дар Маскав ба сар мебурд. Соли гузашта гурӯҳи 31-нафарии ҳамроҳони ӯро Додгоҳи олӣ ба муҳлатҳои аз 10 то 25 сол маҳкум ба зиндон кард. Додгоҳ ин гурӯҳро ба ҳамдастӣ дар куштори Толиб Бобоев – собиқи муовини додситони кулли Тоҷикистон дар соли 1999, таъсиси иттиҳоди ҷиноӣ, сохтакории аснод, пинҳон доштани андоз ва дигар ҷиноёт айбдор эълон кардааст. Боздошти ин гурӯҳ дар тирамоҳи соли 2007, ба думболи ифтитоҳи парванда алайҳи Низом Ҷӯраев сурат гирифта, бозбинии додгоҳии парвандаи онҳо дар миёнаҳои соли гузаштаи 2008 оғоз ёфта буд. Аксари ин 31 нафар сокини ноҳияи Исфара ва умдатан ҳамкорони собиқи Низом Ҷӯраев мебошанд. Ҳукми Додгоҳи олӣ нисбати гурӯҳи Низомхон Ҷӯраев матбуоти Тоҷикистон ва ҳамчунин доираҳои сиёсии кишвар баҳсу вокунишҳоро ба бор оварда буд. Дар пайи эъломи ин ҳукм додситони кулли вақти Тоҷикистон Бобоҷон Бобохонов зимни як нишасти матбуотӣ онро "беадолатона ва ғайриқонунӣ” унвон кард. Ҷаноби Бобохонов гуфта буд, ки агар Додгоҳи олӣ ин ҳукмро бознигарӣ накунад, Додситонии кул омода аст, алайҳи қозии парвандаи мазкур як парвандаи нав боз кунад. Вале ҳукми додгоҳ дар қиболи гурӯҳи Низомхон Ҷӯраев бетағйир боқӣ монд.
| 
