Мақомоти вазорати корҳои дохилӣ мегӯянд, ки зимни як амалиёти нерӯҳои интизомӣ дар минтақаи Рашт ду тан аз аъзои гурӯҳи Мирзохуҷа Аҳмадов боздошт шудаанд. Ба гуфтаи мақомот, афроди боздоштшуда мусаллаҳ будаанд, аммо зимни боздошт фурсати истифода аз силоҳ ва муқовимат бо нерӯҳои давлатиро наёфтаанд. Маҳмадулло Асадуллев, сухангӯи вазорати умури дохилии Тоҷикистон дар мусоҳибае бо Озодӣ ин хабарро тасдиқ намуд ва гуфт, ки ин ду нафар аъзои фаъоли ин гурӯҳи ба гуфтаи ӯ, ҷиноӣ будаанд ва дар ҷараёни амалиёти фаврӣ ва ҷустуҷӯӣ рӯзи гузашта боздошт шуданд.
Сухангӯи вазорати дохилӣ афзуд, ба далели халал ворид нашудан ба ҷараёни тафтишот ва идомаи ҷустуҷӯи аъзои боқимондаи ин гурӯҳ аз ифшои номи афроди боздоштшуда худдорӣ мешавад.
Мирзохуҷа Аҳмадов, аз фармондеҳони пешини Иттиҳоди мухолифини пешини тоҷик ва сардори собиқи раёсати мубориза бо ҷиноёти созмонёфтаи минтақаи Рашт баъд аз анҷоми як амалиёт барои боздошти ӯ аз маҳалли зисти худ фирор кардааст.
Ҳамла ба манзили Аҳмадов се рӯз баъд аз ҳодисаи ҳамла ба Корвони вазорти дифоъ ва кушта шудани 25 сарбоз дар дараи Камров сурат гирифт. Ҳамлаи ғофилгирона ба корони вазорати дифоъ рӯзи 19 -уми сентябр сурат гирифта буд.
Мақомот гуфтаанд, ки аз манзили зисти Мирзохуҷа Аҳмадов силоҳу муҳимот пайдо кардаанд.
Мирзохуҷа Аҳмадов аз сӯи мақомот ба пинҳон кардани Мулло Абдулло (Абдулло Раҳимов) фармондеҳи пешини ИНОТ, ки гуфта мешавад ба ҳаракати исломии Узбакистон пайваста ва робитае бо Ал-Қоида ва Толибон дорад муттаҳам шудааст.
Мақомот инчунин гуфтаанд, ки Аҳмадов дар ҳамла ба корвони нерӯҳои вазорти дифоъ дар рӯзи 19 -уми сентябр низ даст дорад.
